Шилжихээс өмнө
Худалдан авагч тань аль ч үед захиалга өгч чаддаг байхын тулд шинэ дэлгүүрээ бүрэн бэлдэж, туршсаны дараа л хуучин сайтаа хаана. Эхлээд OpenShop дээр дэлгүүрээ нээнэ: бүртгэл, ДАН баталгаажуулалт, нэр ба хаяг, гэрээ. Заавар нь docs.openshop.mn/open-shop хуудсанд бий.
- Хуучин платформоосоо барааны жагсаалтаа CSV файлаар татна. Татах боломжгүй бол барааны хуудасны холбоосуудаа бэлдэнэ.
- Захиалгын түүх, харилцагчийн жагсаалт, тайлангаа хуучин платформоосоо татаж өөртөө хадгална. Эдгээр нь OpenShop руу шилжихгүй.
- Хуучин платформын нэрээр байгуулсан төлбөрийн гэрээ шилжихгүй. OpenShop дээр төлбөрөө шинээр холбоно.
Бараагаа CSV файлаар оруулах
Консолын Бараа хуудсанд Импорт товчийг дарж, CSV файл табд файлаа сонгоно. OpenShop-ийн загвар файл болон Shopify-аас Export хийсэн барааны CSV файлыг танина.

- OpenShop-ийн загвар: Загвар татах холбоосоор авна. Багана нь handle, title, description, price_mnt, sale_price_mnt, sku, barcode, stock_qty, category, brand, tags, image_urls, option1_name, option1_value-аас option3 хүртэл.
- Монгол гарчиг ч уншина: Нэр, Тайлбар, Үнэ, Хямдралтай үнэ, Хуучин үнэ, Барааны код, Баркод, Үлдэгдэл, Ангилал, Брэнд, Шошго, Зураг.
- Ижил handle-тэй мөрүүд нэг барааны хувилбар болно (жишээ: Өнгө, Хэмжээ). Бараанд 3 хүртэл сонголт, 100 хүртэл хувилбар.
- image_urls баганад зургийн холбоосуудыг зай эсвэл таслалаар тусгаарлана. Бараанд 10 хүртэл зураг.
- Shopify-ийн export: нэг Handle-тэй мөрүүд нэг бараа болж, Option баганууд хувилбар болно. Vendor брэнд, Product Category эсвэл Type ангилал, Tags шошго, Image Src зураг, Variant Inventory Qty үлдэгдэл болно. Ганц хувилбартай барааны Compare At Price хямдралын өмнөх үнэ болно.
- Үнийг төгрөгөөр, бүхэл тоогоор уншина: 89000, 89,000, 89 000₮ зөв. 12.50 гэх мэт бутархай үнэтэй мөр алдаатай гарна.
- Файл UTF-8 кодчилолтой байна. Excel-д CSV UTF-8 хэлбэрээр хадгална. Таслал, цэгтэй таслал, tab тусгаарлагч бүгд болно.
- Нэг файлд 500 хүртэл бараа, 5 МБ хүртэл.
Холбоосоор оруулах
Файл татах боломжгүй бол Холбоосоор (URL) табд барааны хуудасны холбоосыг мөр бүрт нэгийг бичнэ. Систем хуудас доторх барааны бүтэцтэй өгөгдлийг уншина.
- Нэг удаад 20 хүртэл холбоос.
- Хуудсанд schema.org Product эсвэл ProductGroup бүтэцтэй өгөгдөл (JSON-LD) байвал нэр, тайлбар, зураг, үнэ, SKU, баркод, брэнд, хувилбарыг уншина. Хувилбарын өнгө, хэмжээ, материал, хээ эсвэл нэрлэсэн нэмэлт шинж чанар нь сонголт болно. Дууссан гэж тэмдэглэгдсэн хувилбарын үлдэгдэл 0 болно.
- Бүтэцтэй өгөгдөлгүй хуудаснаас Open Graph мэдээллийг уншина: гарчиг, тайлбар, зураг, үнэ.
- Shopify дэлгүүрийн нүүр хуудасны хаягийг ганцаар нь оруулбал нийтлэгдсэн 500 хүртэл барааг хувилбар, ангилал, брэнд, шошготой нь уншина.
- Үнийн валют төгрөг биш эсвэл тодорхойгүй бол үнэ хоосон үлдэж анхааруулга гарна.
- Shopify дэлгүүрийн барааны хуудас бол хувилбар, ангилал, брэнд, шошгыг нь уншина. Бусад барааны хуудаснаас ангилал, шошго, үлдэгдлийн тоо уншигдахгүй, тэдгээрийг консолоос нэмнэ.
- Бүтэцтэй өгөгдөл ч, Open Graph ч байхгүй хуудас алдаатай гарч, барааны мэдээлэл олдсонгүй гэж бичигдэнэ. Ийм үед CSV файл ашиглана.
Шалгаж, импортлоод нийтлэх
- Шалгах товчийг дарна. Каталогт юу ч бичигдэхгүйгээр мөр бүрийн үр дүн, алдаа, анхааруулга харагдана.
- Дэлгүүрт байхгүй ангиллыг үүсгэх бол Байхгүй ангиллыг шинээр үүсгэх-ийг тэмдэглэнэ. Үгүй бол тэдгээр бараа ангилалгүй орно. Байхгүй брэнд автоматаар үүснэ.
- Импортлох товчийг дарна. Импорт ар талд үргэлжлэх тул хуудсаа хааж болно.
- Дууссаны дараа Ноорог бараа харах товчоор орж бараа бүрийн үнэ, хувилбар, зураг, ангиллыг шалгана.
- Барааг нийтэлнэ. Мэдээлэл нь дутуу (жишээ нь тайлбар, зураг, үнэ) бараа нийтлэгдэхгүй бөгөөд юу дутууг жагсааж харуулна.
- Импортолсон бараа бүгд ноорог болж орно. Автоматаар нийтлэгдэхгүй.
- Зогсоох товч дарвал явагдаж буй барааг дуусгаад зогсоно. Нэмэгдсэн ноорог бараа үлдэнэ.
- Хувилбартай бараанд хуучин үнэ (хямдрал) импортлогдохгүй. Хямдралаа консолоос тохируулна.
Юу шилжихгүй вэ
Импорт зөвхөн барааг шилжүүлнэ. Доорх зүйлсийг хуучин платформоосоо татаж хадгалаад, хэрэгтэйг нь OpenShop дээр шинээр үүсгэнэ.
- Захиалгын түүх ба тайлан.
- Худалдан авагчийн бүртгэл ба нууц үг. Худалдан авагч OpenShop дээр шинээр нэвтэрнэ.
- Сэтгэгдэл ба үнэлгээ. OpenShop дээр сэтгэгдлийг зөвхөн тухайн дэлгүүрээс худалдан авсан хүн үлдээнэ.
- Купон, урамшуулал, бэлгийн картын үлдэгдэл, оноо. Маркетинг хэсгээс шинээр үүсгэнэ.
- Блог, мэдээллийн хуудас. Вэбсайт хэсгээс шинээр нэмнэ.
Төлбөр ба и-баримт
Бараагаа нийтлэхтэй зэрэгцээд төлбөрийн хүсэлтээ илгээгээрэй. Зөвшөөрөл хүлээх хооронд бараагаа шалгаж болно.
- Төлбөр: QPay, картын төлбөрийг дэлгүүрийн мэдээллээ илгээж зөвшөөрөл аваад холбоно. Хэтэвч, хэсэгчлэн төлөх хэрэгслийг оператортой байгуулсан өөрийн гэрээгээр холбоно. Заавар: docs.openshop.mn/payments.
- И-баримт: ТТД-ээ оруулж хүсэлт илгээнэ. Зөвшөөрөгдсөний дараа төлбөр бүрд баримт автоматаар гарна. Заавар: docs.openshop.mn/e-receipt.
- Холбосны дараа бага дүнгээр нэг бодит төлбөр хийж, мөнгө дансанд тань орж буйг шалгана.
Өөрийн домэйн ба хуучин холбоосууд
Өөрийн домэйнаа хамгийн сүүлд OpenShop руу заана. DNS-ийн бичлэгээ солих хүртэл хуучин сайт тань ажилласаар, нэр.openshop.mn хаяг ч бас ажилласаар байна.
- Тохиргоо → Сайт таб дахь Өөрийн домэйн хэсэгт домэйнаа бичээд Холбох товчийг дарна.
- Домэйнийхээ DNS дээр дэлгэцэнд харагдах A бичлэгийг нэмнэ. www-г ч мөн нэмэхийг зөвлөж байна.
- DNS тараагдсаны дараа Шалгах товчийг дарна. 24 цагийн дотор баталгаажуулаагүй бол цуцлагдаж, дахин холбоно.
- Баталгаажсаны дараа SSL сертификат автоматаар идэвхжиж, домэйн тань шинэ дэлгүүрийг харуулна.
Дэлгэрэнгүйг docs.openshop.mn/website хуудасны Өөрийн домэйн холбох хэсгээс уншина.
Хайлтын систем
Шинэ дэлгүүрийн sitemap.xml, барааны бүтэцтэй өгөгдөл, llms.txt автоматаар үүснэ. Хуучин хуудаснууд хайлтын үр дүнгээс аажмаар гарч, шинэ хуудаснууд орно.
- Өөрийн домэйнтэй бол Google Search Console-д шинэ sitemap.xml-ээ илгээнэ.
- Тохиргоо → Хайлтын систем таб дээр SEO гарчиг, тайлбар, хуваалцах зургаа тохируулна.
- Дэлгэрэнгүй: docs.openshop.mn/search-visibility.
Шилжилтийн шалгах хуудас
- Хуучин платформын захиалгын түүх, харилцагчийн жагсаалтаа татаж хадгалсан.
- Бараагаа импортолж, ноорог бүрийн үнэ, хувилбар, зураг, ангиллыг шалгаад нийтэлсэн.
- Хүргэлтийн төлбөрөө тохируулж, хүргэлт, төлбөр, буцаалтын нөхцөлөө бичсэн.
- Төлбөрөө холбож, бага дүнгээр нэг бодит төлбөр хийж туршсан.
- И-баримтын хүсэлтээ илгээсэн.
- Купон, урамшуулал, блог, хуудсаа шинээр үүсгэсэн.
- Өөрийн домэйнаа холбож, SSL идэвхтэй болсныг шалгасан.
- Сошиал хуудас, зар, QR кодын холбоосоо шинэ хаяг руу сольсон.
- Хуучин сайтаа хаахаас өмнө шинэ дэлгүүрээс туршилтын захиалга өгч үзсэн.